Le POEME en Soninke [ SOONINKEN NI ! ].

[kabu tirera]

ROKKUTO
Inke xaranbali yan tanpi
Tuwaanon do i tuwaaxunin da in tanpindi
Kitaabu gumun do i kitaabun da in sankundi
In kori kiyen do wuron bakka me
Ku na ti a xullen ni
Ku na ti a binnen ni
Ku wa in kawandini ti in teye
Ku wa in tonon ti in nooge
Nke ALLA kome yan lasame lenki soro
In ga na daga ti in teye
Noogu gumun na ti in ma xara
In ga na daga ti in nooge
Teye gumun na ti in ma xara
Jaxa xaranbali ma ni kome ya
Jaxa xaranbali faaba ni komodunkome

Woyile xaranbalaaxu , Woyile yinmanbinnaaxu
In ga lasame , lasamaye fataama
In ga kori , kori fataama
Inke ti :"ALLA da duna kini fatanxulle"
Inke digaame yan da bone riti
Inke diganta yan da kasaara xenundi in kanma
Jaxa inke digaame ni tuwanbalaaxu digaame
Jaxa inke sefe ni yinmanbinnaaxu sefe

A ga sefene in da junubu
Junubu in do in xabiilan naxa
A ga sefene in da golli bure
Golli bure in do in Kaman naxa
Ke digaame saabudan yan sigi
Xabiilan ga kori kaane kitta
Ke diganta sababun yan sigi
Xabiilan feerun ga toxi bite
Na xabiilan soorun toxo sanko
Sikkan do haasidaaxun ro xabiilan sodonme

Inke ro bite,na in xabiilan ro bite
Inke ro sanko,na in xabiilan ro sanko
In ga kori , in ga lasame , in ga tilifi
In xaaru , in luuke
In ma sere wori xa da in yinme wori
In ti rokkuto
Gelli ken koota
In ga na daqu , in na ti rokkuto
In ga na dulli , in na ti rokkuto
In ga na wati , in na ti rokkuto
Golli sire , golli bure
Inke na ti rokkuto
Rokkuto duumante , rokkuto raabante ma in xooxon renmu

Safandaana: Alaaji Gileenu NJAAY

xaranmoxo nawaari ti an haqille siren di