Xransuuge..

'' ŋalintaaxu ''
ŋalintaaxu...
ke ŋalintaaxu faranpare.
ke ŋalintaaxu gemunte.
ke ŋalintaaxu daxamunte.
koota liŋe nsu wa dangini.
koota xotu nsu wa ñemene.
koota su ra nta ñaana salle.
ŋalintaaxu nti sunpu.
ŋalintaaxu nti marenmaxu.
A wa xanaaxun xilli.
Na hinneyen tintondi.
A na denme ña saarana.
Yogo da ŋaaliye xanu.
Yogo da ŋaaliyen xoni.
Yogo t'a neye ni.
Yogo t'a xote ni.
Yogo t'a liŋe ni.
Yogo t'a junne ni.
Yogo t'a mulle ni.
Yogo t'a teye ni.
Yogo t'a xaraxacce ni.
Yogo t'a malacce ni.
Ke ŋalintaaxu daxamunte.
Ke ŋalintaaxu gemunte.
Ke ŋalintaaxu faranpare.
A da yogo xaranŋundi.
A da yogo sankundi.
A da yogo wundu.
Na yogo tuurindi.
A da yogo saakondi.
Na yogo xaaxandi.
Yogo da tu, Yogo m'a tu.
Ke ŋalintaaxu...
A na kootanu ña xilli.
Koota liŋu, koota gemunto.
Koota faranparu, Koota sugandinto.
Xanuye noxon di.
Hinneye noxon di.
Kappe noxon di.
Denme noxon di.
ke ŋalintaaxu xote...
Ke ŋalintaaxu juppe...
Ke ŋalintaaxu deppe...
Ke ŋalintaaxu jootinte...
A na xanuyen ña wundunu.
Na suuxuye banbaado boyi.
A da xoniyen kaccen fuutu.
A da daaru dangindi.
Na lenki xaranŋundi.
Na sinmaye ña taaxalenma yi.
Na yaaxanji ña taagumanse yi.
Na siroye ña faare yi.
Na sange ndo soobe tintondi.
Ke ŋalintaaxu sabarinte...
A ga wuunu do soron batte.
A ga ma mungu d'i yinme ya.
A t'iken ŋaalini ti soron ña.
Soron ga nta no, i do honyaatu na xiidi.
A t'i ken sigitonte ni jin ña.
Jin mulle - Jin teye...
Jin xulle - Jin binne...
Jin dunbe - ji mallinte.
Ji nga nta no, ŋalintaaxu nta no.
A t'i ken jiidini ti tuwaaxun ña.
Koota su tuwaaxu...
Koota su taagumansu...
Koota su d'i tono ya ni...
Eh; ke ŋalintaaxu...
Nke xa jooti lenki.
Nke xa kanu lenki.
Nke xa hanmi lenki.
Daaru da mani wari ?
Lenki da mani mugu ?
Xunbene da mani gemundi ?
Eh; ŋalintaaxu...
Nke xa lasame lenki.
Daaru ñi kan moxo ya ?
Lenki na kan yaaxe ya ?
Xunbene da mani gemundi ?
Eh; ŋalintaaxu...
Nke ti an n'in xarandi kiye.
An n'in xarandi wuro.
Nke sankunte ya ni.
Nke mungunte ya ni.
Nke ni finkkinte yi.
Nke lungunte ya ni.
An n'in xarandi...
An nan max'in xaara xaara.
An n'in xarandi...
An nan max'in xaaxa.
An n'in xarandi...
An nan max'in xonindi.
Nke ti an n'in sinmandi
Ke ŋalintaaxu; an n'in sinmandi.
Max'in sikkandi nga sikki.
Max'in sikkandi nga sunono.
Max'in sikkandi nga sontono.
An n'in wundu nga wuunu.
An nan max'in xenqendi.
An n'in xumaari t'an tuwaaxu.
Max'in liixi t'an xuuto.
An n'in ña terinkandaana yi.
An nan max'in ña tuurinte yi.
Nke d'an xanu m'in xore.
Nga ŋaalini dinma su noxo.
Nke d'an xanu m'in xanne.
Nga xanini xanne su.
Nke d'an xoni xoniye su.
Nga xoronjini xota su.
Nke d'an xoni xiide su.
Nga xootini goloqe su.
Nke ŋaali nan ŋaali.
M'in ga ŋaamini.
Xooli xooron wuru d'in batte.
Lanba xooro d'in sagata ma sagandu.
Xaara xooro xenqe n yaaxon kanma.
Xaaralenmu n sigi d'in batte sagandu.
Fanxooron fanqe d'in batte.
Fanlenmu tiigo ti toxon ŋa.
Geeji xooron yoole d'in batte.
Geeji d'in faga ti sappe.
Nke ga yoolene woye noxon ŋa.
Nke yaarene do waxalaqun ŋa.
Jaaxa jaxatanxaye kasappe ya ni.
Fuura xooro nda geejin kutu.
Fuuralenmu nga banbene jin kanma.
Nke ti ŋalintaaxu...
An d'in lasama xadi.
An d'in kaawandi xadi.
Nkee ga mulle noxon ŋa.
Nke ga tewoye noxon ŋa.
Sagandu giden kanma, gidi gille.
Tappa giden kanma, gidi gille.
Tooya lanbe noxon ŋa, lanba xoore.
Magi xaare noxon ŋa, xaara xoore.
Dooro xaaren kanma, xaara xoore.
Ke ŋalintaaxu fuuge, fuugu xuufunte.
A na renmu, A na xuufu.
Xaralle ndo sangume, malasoye duuro.
Hari n'o ŋaalindi katta ŋanniyi sire banbaado.
'' ŋalintaaxu ni xarankonpe ya ''
'' ŋaame xooren siine ña sooninkon maxa taagumanse yi ''
'' Yilli dunbe n siine nga ña xarankonpo xase ''
'' Xaranyinbe ña da mayisin saara ''
Ke ŋalintaaxu nd'an xanu nga ŋaalini an noxo.
An n'in xanu nga watini an noxo.
Max'in mungundi d'in yinme yi.
Nga sankunu xabiila noxon di.
Nke ni soninkara deena.
Nke ni deenandunbe...
An ga n'in neene n naa kuuru.
An ga n'in katu n naa wuyi wuunu.
Nke ga wuyu baren kanma.
Nke ga wuyun wuro noxon ŋa.
Nga wurunu do waalen batte.
Soninkara waale, waale gemunte.
Nda ŋalintaaxun wari, Na ŋalintaaxun temu.
Nke na tunkan senne maama.
Tunkanu tunka xoore.
Tugunnaaxu d'in xaranŋundi ŋalintaaxun senne.

Safandaana Soninkara deena / Aliou Goundo Si Sawaane.
Gereesi Jamaane Atiina debe noxo.